Bil-filmat: Il-Korea ta' Fuq teqred belt Amerikana b'missili nukleari … waqt serata mużikali!

Apr 19, 2017 10:55
Miktub minn iNews

F'dak deskritt bħala wirja akkumpanjata b'mużika, id-dittatutur tal-Korea ta' Fuq Kim Jong-un jidher jitbissem u jxejjer lil folla preżenti waqt li ra simulazzjoni ta' belt Amerikana tinqered f'attakk nukleari.

Il-Korea ta' Fuq organizzat din is-serata biex tfakkar it-twelid tal-fundatur tal-pajjiż Kim Il-Sung, liema serata ntemmet b'“missili” sparati lejn l-Istati Uniti.

Fil-filmat li ntwera l-missili jidhru jiġu sparati u jittajru lejn l-Istati Uniti fejn eventwalment jisplodu fi blalen ta' nirien kbar.

Il-filmat intemm b'xena tal-bandiera Amerikana maħkuma min-nirien, u ringiela wara ringiela ta' slaleb f'ċimiterju.

Fi Frar li għadda l-Korea ta' Fuq saħqet li kienet wettqet b'suċċess testijiet ta' missila bassilistika ta' distanza medja. Fil-parata militari ta' nhar is-Sibt li għadda kien hemm għall-wiri dawk li jidhru bħal missili ballistiċi interkontinentali ġodda.

Il-Korea ta' Fuq ta' spiss thedded li teqred lill-Istati Uniti u f'perjodu mimli tensjoni fuq il-peniżula Koreana, użat kliem iebes ta' theddid fil-konfront tal-Istati Uniti fejn wissietha bi gwerra nukleari jekk l-Istati Uniti tuża l-militar fil-konfront tagħha.