Tliet snin ħabs għal salesgirl

  • Jan 11, 2018 15:54
  • Miktub minn iNews
"

    Salesgirl ta' 39 sena kienet ikkundannata tliet snin ħabs wara li nstabet ħatja li żammet għaliha flus li kien taha Libjan b'konnessjoni ma' negozju li kellhom bejniethom.

    Il-Pulizija bdiet tinvestiga lil Joanne Sciberras wara rapport li sarilha minn Abdurraouf Mohamed Eddegram.

    Fir-rapport lill-Pulizija huwa qal li f'Novembru 2014 iltaqa' ma' Sciberras u talbitu jgħinha finanzjarjament peress li kellha kontejner bix-xorb maqbud id-Dwana u riedet tħallas biex jinħareġ.

    Kien għalhekk li għaddilha €2,400 quddiem l-accountant tiegħu u Sciberras wegħditu li kienet se tagħtih nofs il-qliegħ minn fuq il-bejgħ tal-imsemmi xorb.

    Jumejn wara nfurmatu li l-qliegħ kien se jkun ta' €20,000 u li għalhekk sehmu kien se jkun ta' €10,000. Fl-istess waqt offrietlu li jew tagħtih l-€10,000 u l-€2,400 li kien silifiha nkella seta jidħol sħab magħha fin-negozju.

    Eddegram aċċetta li jidħol sħab magħha biex jibda jesporta lejn pajjiżu u qablu li jġbu ħames kontejners xogħol li kienu se jiswew €80,000.

    Hija talbitu €50,000 bil-quddiem u waqt li qaltlu li l-kunsinna maħruġa mid-Dwana nbiegħet għal €43,000 riedet is-€7,000 ħalli jibgħatu l-merkanzija Ċipru.

    Eddegram għalhekk silifha s-€7,000 fejn taha €4,000 fuq ċekk maħruġ fuq ċertu Mario Azzopardi, l-imgħallem tiegħu, u €2,400 fi flus kontanti. B'kollox sostna li għaddilha €9,300.

    Sa Marzu 2015 il-ħames kontejners kienu għadhom ma waslux u meta kien jistaqsiha x'ġara minnhom kienet tgħidlu li maqbudin id-Dwana. Għalkemm wegħditu wkoll li tagħtih lura l-flus baqgħet ma tathomlux.

    Huwa kien anke taha ċekk ieħor biex tħallas lid-Dwana fejn ħallih vojt imma mbagħad sar jaf li minflok lid-Dwana kien tħallas ċertu Mario Calleja.

    Il-Pulizija interrogat lil Sciberras u eventwalment l-Ispettur Rennie Stivala ressaqha fil-Qorti tal-Maġistrati fejn akkużaha li f'Novembru 2014, u fil-ġimgħat u xhur ta' qabel, wettqet miżapproprjazzjoni ta' flus u frodi b'dannu għal Eddegrem.

    Quddiem il-Maġistrat Donatella Frendo Dimech hija baqgħet tinsisti li mhux veru għaddilha €9,000 imma €6,490 u semmiet kif biċ-ċekk ta' €4,000 kienet ġabet xogħol minn Sqallija.

    Hija sostniet li l-ewwel flus li taha ma kienux fuq xogħol imma għaliha personali peress li kienet għaddejja minn żmien diffiċli u nsistiet li kienet l-intenzjoni tagħha li tħallsu lura.

    Wara li semgħet il-provi, l-imsemmija maġistrat irrimarkat li fil-kawża rriżulta li ma kienx hemm qbil dwar l-ammont u raġuni għaliex għaddew il-flejjes peress li hi qalet li l-flus kienu self mogħti lilha minnu u li għaddilha €4,000 għal ħwejjeġ u €2,000 għal hampers mentri hu qal li kien silifha €9,000 biex jinġiebu l-kontejners.

    Waqt li għamlitha ċara li hija ma temminx li Eddegram kien jaf fuq xiex intefqu l-flus, il-Maġistrat Frendo Dimech irrimarkat li huwa ma rnexxielux jipprova li għaddilha €9,000 imma €7,600.

    Hija ikkonkludiet li mill-provi ma jidhirx li Sciberras kellha l-intenzjoni li tqarraq bih u għalhekk ma sabitux ħati ta' frodi imma ta' miżapproprjazzjoni ta' flus u waqt li rrimarkat kif minħabba s-sitwazzjoni prekarja tagħha Sciberras mhux mistennija tħallsu,  ikkundannata tliet snin ħabs.

    Simili

  • Agħżel storja li tixtieq tikkummenta dwarha u agħfas fuq il-ħolqa "ikkummenta" li tinsab taħt l-artiklu.

    Wara dan tinfetaħlek tieqa fejn tintalab tirreġistra. Agħfas fuq "irreġistra" u imla d-dettalji kif mitlub. Importanti li kull dettall imdaħħal ikun korrett. Minkejja li tintalab timla indirizz tal-imejl li huwa eżistenti u mhux fittizju, inti xorta tista' tikkummenta b'mod anonimu.

    Wara li tibgħat id-dettalji tiegħek, se tirċievi imejl fuq l-indirizz li rreġistrajt bih. F'din l-imejl se tirċievi security code.

    Ikkupjah u daħħlu fit-tieqa tar-reġistrazzjoni. Din hija proĊedura li ssir darba.

    Minn hemm 'il quddiem tkun tista' tikkummenta fuq kull artiklu bin-nom-de-plume tal-għaໝla tiegħek. Jekk issib xi diffikultà tiddejjaq xejn tikkuntattjana fuq 2590 0288.

Kummenti: 0

    0