Lejn għaqda sħiħa fil-pajjiż u fil-partit

  • Jan 08, 2020 08:06
  • Miktub minn Chris Fearne

    Nhar is-Sibt li ġej, 11 ta’ Jannar 2020, il-membri tesserati tal-Partit Laburista se jkunu qegħdin jagħżlu Mexxej ġdid għall-Partit Laburista u konsegwenzjalment Prim Ministru ġdid għall-pajjiż. Dan se jsir wara r-riżenja tal-Mexxej Laburista u Prim Ministru attwali Joseph Muscat.

    Ħassejtni fid-dover li nwieġeb għas-sejħa tal-partit u eventwalment tal-pajjiż li nitfa’ l-kandidatura tiegħi għal din il-kariga. Dover li nħoss li hu akbar minn dak normali partikolarment minħabba ċ-ċirkostanzi li wasslu għalih. Ċirkostanzi li jirriflettu bżonn kardinali: għaqda sħiħa kemm fuq bażi ta’ nazzjon kif ukoll fuq bażi ta’ partit. 

    Inħoss illi kieku ma kkontestajtx kont inkun qed nonqos lill-Partit Laburista li fih ili nimmilita għal aktar minn 40 sena u lill-pajjiż li nemmen bil-kbir li fit-tmexxija tiegħu għandu bżonn persuna b’esperjenza, dixxiplinat u lest li jieħu d-deċiżjonijiet fl-interess kemm tal-partit u aktar u aktar tal-pajjiż bla ħarsien lejn l-uċuħ, ikunu ta’ min ikunu.

    L-esperjenza ma tkunx riflessa biss fl-età imma f’ħidmitek u kemm tkun mifruxa ħidmitek. Fil-mod kif tali ħidma tkun tnisslet, tkabbret u intużat sa mill-għeruq tagħha kemm fuq bażi ta’ partit kif ukoll fuq bażi ta’ pajjiż, ta’ poplu. Ħarsa lura lejn dawn l-aħħar 40 sena ta’ ħajti turini għaddej minn dak kollu li toffri l-ħajja fuq iż-żewġ binarji, il-binarju ta’ partit u dak ta’ pajjiż. Dak ta’ partit mil-livelli taż-żgħażagħ b’pass wara pass biex illum nokkupa l-kariga ta’ Deputat Mexxej għall-Affarijiet tal-Parlament u allura Deputat Prim Ministru. Kont magħkom mill-bidunett ta’ vjaġġ glorjuż mibdi minn Joseph Muscat li b’sodisfazzjon ngħid li għamilt endorsement lil Joseph fis-sena 2008 meta nħatar Mexxej.

    Fuq livell ta’ pajjiż dħalt b’ruħi u ġismi fil-qasam tas-saħħa, fejn b’umiltà ngħid li b’ħidma kollettiva wassalna lil pajjiżna minn waħda xejn feliċi għal dik tal-lum, mal-aqwa għaxar pajjiżi tad-dinja fejn jirrigwarda saħħa.

    L-esperjenza taż-żewġ binarji kattritli l-għarfien tal-bżonn ta’ għaqda kontinwa kif riflessa mis-suċċessi li ksibna fuq iż-żewġ fronti. L-esperjenza wrietna wkoll l-oppost, li meta bħala partit ma konniex magħqudin spiċċajna minn partit rebbieħ għal partit tellief. Hekk ukoll bħala pajjiż. Għixt iż-żewġ esperjenzi u għalhekk nibqa’ ninsisti u nagħmel ħilti kollha biex ikollna l-għaqda, aktar u aktar fiċ-ċirkostanzi riċenti li għaddejna bħala partit u bħala pajjiż.

    Huwa dmir kull wieħed u waħda minna li nikkontribwixxu għal dan il-għan bil-modi disponibbli għal kull wieħed u waħda minna. Wara nhar is-Sibt li ġej tkun xi tkun id-deċiżjoni tal-membri tesserati tal-Partit Laburista l-aġenda għandha tkun waħda, dik li nkomplu inżommu l-għaqda bejnietna bħala partit u b’sens ta’ dover lejn pajjiżna naraw li flimkien, ġejjin mnejn ġejjin, nimbarkaw fuq ħidma għalenija biex jitrażżan is-sens ta’ firda fost il-poplu għax huwa bl-għaqda li nistgħu niggarantixxu li pajjiżna jkompli fuq ir-rotta tajba li mexjin fuqha, li jkompli jitkattar il-ġid b’risq il-poplu Malti u Għawdxi kollu.

    Għal dan il-għan se nkun qed inkompli ħidmieti fuq bażi ta’ partit u fuq bażi ta’ pajjiż. 

     

    Simili

  • Agħżel storja li tixtieq tikkummenta dwarha u agħfas fuq il-ħolqa "ikkummenta" li tinsab taħt l-artiklu.

    Wara dan tinfetaħlek tieqa fejn tintalab tirreġistra. Agħfas fuq "irreġistra" u imla d-dettalji kif mitlub. Importanti li kull dettall imdaħħal ikun korrett. Minkejja li tintalab timla indirizz tal-imejl li huwa eżistenti u mhux fittizju, inti xorta tista' tikkummenta b'mod anonimu.

    Wara li tibgħat id-dettalji tiegħek, se tirċievi imejl fuq l-indirizz li rreġistrajt bih. F'din l-imejl se tirċievi security code.

    Ikkupjah u daħħlu fit-tieqa tar-reġistrazzjoni. Din hija proĊedura li ssir darba.

    Minn hemm 'il quddiem tkun tista' tikkummenta fuq kull artiklu bin-nom-de-plume tal-għaໝla tiegħek. Jekk issib xi diffikultà tiddejjaq xejn tikkuntattjana fuq 2590 0288.

Kummenti: 0