Formula Wieħed: Lewis Hamilton jirbaħ id-90 Grand Prix tal-karriera

Is-sewwieq Britanniku tal-Formula Wieħed, Lewis Hamilton (Mercedes), rebaħ il-Grand Prix li sar għall-ewwel darba fit-Toscana, fiċ-ċirkwit ta’ Mugello.

Dan il-Grand Prix, li kien l-1,000 wieħed tal-Ferrari, irriżulta f’wieħed kaotiku u mimli inċidenti bil-konsegwenza li kellu jieqaf darbtejn filwaqt li 10 karozzi kellhom jirtiraw.

Din kienet is-sitt rebħa ta’ Hamilton f’dan l-istaġun u d-90 waħda tal-karriera tiegħu … biex issa jinsab waħda ‘l bogħod biex jilħaq ir-rekord tal-leġġenadarju, il-Ġermaniż Michael Schumacher.

Fil-veritá, huwa kellu ħruġ ħażin meta nqabeż mill-kollega tiegħu, il-Finlandiż Valtteri Bottas, iżda rkupra biex reġa’ ħa l-kmand ta’ din it-tiġrija.

L-ewwel inċident seħħ meta t-Taljan, Antonio Giovinazzi (Alfa Romeo) ħabat ħafif mas-sewwieq Kanadiż, Nicholas Latifi (Williams) u kellha tinħareġ is-safety car. 

Imbagħad, l-Ispanjol Carlos Sainz Jr  (McLaren) ħabat ma’ Giovinazzi, liema inċident seta’ kellu konsegwenzi ferm koroh għal Giovinazzi li fortunatament ħelisha ħafif.

Id-Daniż, Kevin Magnussen (Haas) ukoll kien involut f’dan l-inċident, b’erba’ sewwieqa jibqgħu deħlin fil-barrikati.

It-tiġrija reġgħet waqfet temporanjament għat-tieni darba wara li l-Kanadiż Lance Stroll (Racing Point) baqa’ dieħel fil-barrikati b’veloċitá qawwija fejn bħal Giovinazzi, ħelisha ħafif.

Hamilton daħal fl-ewwel post meta rreġistra ħin ta’ 2:19:35.060 segwit minn Valtteri Bottas u l-Britanniku Alexander Albon (Red Bull).

In-naħa ta’ fuq tal-klassifika hija: 190 – Lewis Hamilton; 135 Valtteri Bottas; 110 – Max Verstappen; 65 – Lando Norris; 63 – Alex Albon; 57 – Lance Stroll; 53 – Daniel Ricciardo.

Share With: