UEL: Hibernians ikkastigati b’goal fit-tieni taqsima

minn Cristian Muscat  

ritratt: Domnic Borg

Hibernians ……0

Fehervar ……. 1

Hibernians sfaw eliminati mill-UEFA Europa League meta fit-tieni round ta’ kwalifikazzjoni tilfu kontra Fehervar bl-iskor ta’ 1-0.

Fil-veritá l-Ungeriżi ddo­minaw il-pussess tal-ballun għal bosta ħinijiet u dehru teknikament aħjar mit-team Malti peró ma kienux kapaċi jsarrfu s-supremazija tagħhom … b’Hibernians ikunu sfortunati lejn it-    tmiem li ma kisbux id-draw.

Kienu l-Ungeriżi li ħarġu fuq l-offensiva u wara biss seba’ minuti, Ivan Petriak kellu t-tentattiv tiegħu minn qagħda ideali jintemm ftit barra.

Il-mumenti sussegwenti kienu karatterizzati minn ħafna logħob f’nofs il-ground. Peró fid-29 minuta Fehervar tilfu ċans tad-deheb li jiftħu l-iskor meta Loic Nego kellu xutt mill-viċin imblukkat minn Ferdinando Apap.

Minuta wara kien Budu Zivzvadze waħdu quddiem il-goalkeeper Malti li għamel l-impossibbli u xeħet barra.

L-Ungeriżi komplew jattakkaw u fil-35 minuta, Alef kellu xutt mid-distanza salvat mingħajr wisq diffikultá mill-goalkeeper tal-Pawlisti, Matthew Calleja Cremona.

Fil-ftuħ tat-tieni  taqsima, l-Ungeriżi komplew fejn ħallew qabel il-mistrieħ u fil-61 minuta, fetħu l-iskor meta minn azzjoni ta’ corner,  Ivan Petriak xeħet cross lejn l-iżmarkat BOBAN NIKOLOV li kien fil-post it-tajjeb u fil-mument opportun u minn taħt il-lasta spara ġewwa.

Mal-ħin kompla d-dominju assolut ta’ Fehervar u fit-68 minuta setgħu faċilment irduppjaw meta Loic Negro xeħet cross perfett lejn Ivan Petriak li minn pożizzjoni ideali tefa’ barra, bil-Pawlisti jeħilsuha ħafif.

L-Ungeriżi baqgħu jamministraw, bil-Pawlisti jippruvaw iwettqu xi tip ta’ reazzjoni u fid-89 minuta tilfu opportiunitá tad-deheb li jagħmlu l-iskor indaqs, meta Gabriel Izquier xeħet cross fil-baxx lejn is-sostitut Renold Winchester li iżda ma rnexxielux jagħmel kuntatt mal-ballun li ntemm barra.

U dan ma kienx biżżejjed hekk kif proprju minuta biss wara xutt bid-dawra minn ġol-kaxxa tal-attakkant Jurgen Degabriele stampa mal- mimduda.

Fil-ħin miżjud, il-Pawlisti spiċċaw jilagħbu b’10 players meta tkeċċa Shola Shodiya Haruna għal foul fuq Loic Nego li kien tiela’ waħdu.

HIBERNIANS: 1-Matthew Calleja Cremona, 3-Ferdinando Apap, 4-Leandro Almeida, 7-Ayrton Attard (12-Dunstan Vella 83), 8-Jake Grech, 10-Jurgen Degabriele, 13-Zachary Grech (9-Renold Rundell Winchester 64), 18-Gabriel Izquier Artiles, 19-Shola Shodiya Haruna, 20-Andrei Agius, 23-Jose Wilkson Teixeira (6-Edafe Uzeh 74)  – Coach: Stefano Sanderra

FEHERVAR: 74-Adam Kovacsik, 5-Attila Fiola, 6-Vi­sar Musliu, 7-Ivan Petriak (20-Evandro Da Silva 83), 8-Boban Nikolov, 9-Budu Zivzvadze (71-Nemanja Nikolic 88), 11-Loic Nego, 22-Stopira, 77-Bendeguz Bolla, 95-Alef (17-Mate Patkai 51), 96-Lyes Houri   – Coach: Gabor Marton

REFEREE: Ivaylo Stoyanov (Bulgarija)

ASS. REFEREES: Georgi Todorov, Miroslav Maksimov (Bulgarija)

RABA’ UFF: Radoslav Gid­zhenov (Bulgarija)

SKORER: B. Nikolov 61 (F)

AMMONITI: L. Almeida, J. Grech (H); Stopira, A. Kovacsik (F)

TKEĊĊA: H. Shodija 92 (H)

Share With: