UNL: Wirja metikoluża mhux biżżejjed għall-Maltin

Ritratt: Malta Football Assocation

Faroe Islands …… 3

Malta ………………. 2

Il-football kattiv! Il-Maltin lagħbu partita metikoluża, kienu l-aħjar team għal ħinijiet twal u sfaw megħluba 3-2 mill-Faroe Islands b’żewġ goals fl-aħħar minuti liema partita kienet valida minn Grupp D1 tal-UEFA Nations League. 

Sa mis-suffara inizjali, l-avversarji tagħna mill-ewwel urew l-intenzjonijiet tagħhom u ħarġu fuq l-offensiva biex jik­sbu goal kmieni fejn ippruvaw jixħtu pressjoni fuq il-lasti Maltin … iżda d-difensuri tagħna bdew “jifgaw” il-furja tagħhom.

Atletikament dehru aktar ħfief u veloċi mill-Maltin u saħansitra bdew jirrikorru għal crosses fit-tul fuq il-faxex late­rali fit-tentattiv li jaqbdu lid-difiża Maltija fuq sieq waħda … kif proprju ġara fl-ewwel goal. 

Iżda kif sofrejna l-goal, għa­milna reazzjoni u minbarra li konna aħjar mill-avversarji, stajna dħalna nistrieħu fil-vantaġġ. 

Wara biss sitt minuti, il-Fa­roes setgħu faċilment fetħu l-iskor meta mill-cross fit-tul ta’ Vil­jornur  Davidsen, Joannes Bjartalid waħdu quddiem il-goalkeeper Malti, Henry Bonello, na­qas li jolqot il-ballun.

Fit-13-il minuta kellu jkun Bonello li salva goal ċert meta Hallur Hansson żmarka għal kollox lil Brandur Hendriksson li mmira lejn ir-rokna tax-xibka … u bl-għajta tal-goal …. il-goalkeeper Malti kien providenzjali biex imblokka x-xutt tiegħu.

Fit-22 minuta, il-Faroes fallew ċans ieħor meta Solvi Vatnhamar xeħet lejn Bjartalid li dar ma’ Zach Muscat iżda l-konklużjoni tiegħu għaddiet ma’ sieq il-lasta.

Iżda tliet minuti wara huma fetħu l-iskor meta Bjartalid għadda lejn Solvi Vatnhamar li bil-cross insidjuż tiegħu qata’ għal kollox lid-difiża Maltija   biex daħal Klaemint Olsen li minkejja li kien issikkat minn Joseph Mbong, bir-ras xeħet fir-rokna tax-xibka.

Minuta wara, il-Maltin setgħu ngħataw penalty meta minn az­zjoni ta’ corner, Joannes Danielsen litteralment ġibed lil Andrei Agius u niżżlu mal-art … iżda kien kollox normali għar-referee Ungeriż, Adam Farkas.

U proprju fl-ewwel xutt lejn il-lasti avversarji, il-Maltin kisbu d-draw, meta fis-37 minuta, JURGEN DEGABRIELE beda u spiċċa  l-azzjoni meta pplejsja l-ballun fir-rokna tax-xibka … qabel ma għadda lejn Kyrian Nwoko li kompla lejn Luke Gambin biex dan tal-aħħar irreċiproka lejn l-attakkant ta’ Hibernians biex irreġistra l-ewwel goal tiegħu mat-team nazzjonali … u t-30 mill- players Pawlisti. 

Fit-43 minuta, Matthew Guillaumier venven kanunata minn barra l-kaxxa li ġiegħlet lill-goalkeeper, Gunnar Nielsen, idawwar f’corner bi tbatija.

It-tieni taqsima fetħet b’xutt ta’ Hendriksson li spiċċa għoli u fil-55 minuta, Joseph Mbong kien għoddu kkommetta auto-goal meta l-clearance tiegħu mill-cross ta’  Meinhard Olsen, ħabtet mal- mimduda

Fis-68 minuta, Bonello reġa’ salva lit-team Malti meta f’kontrattakk veloċi, Klaemint Olsen xeħet cross għan-nofs fejn sab lil Bjartalid li b’xutt angolat deher li seta’ jiskorja iżda l-goalkeeper Mal­ti salva minn fuq il-linja fatali.

Erba’ minuti wara, il-Maltin meritatament marru fil-vantaġġ meta mill-free-kick ta’ Luke Gambin, ANDREI AGIUS irnexxielu jiżmarka lilu nnifsu u b’xutt mill-ewwel xeħet fir-rokna tax- xibka.

Minuta qabel, Paul Mbong daħal minflok Degabriele biex għamel id-debutt għal Malta u ngħaqad ma’ ħuh Joseph. L-aħħar darba li żewġ aħwa lagħbu fl-istess partita għal Malta kienu Raymond u George Xuereb, fid-draw ta’ 0-0 kontra ċ-Ċekoslovakkja, fil-21 ta’ April, 1985, liema partita kienet valida mir-round ta’ kwalifikazzjoni tat-Tazza tad-Dinja 1986.

B’hekk Joseph u Paul Mbong saru l-ħames par aħwa li lagħbu għal Malta fl-istess partita li kienu jinkludu wkoll lil Lewis u Eddie Theobald, Edward u Ritchie Aquilina u John u Julian Holland.

Bil-minuti għaddejjin u bil-Maltin l-aħjar team fil-ground, kien hemm antiċipazzjoni li konna se niksbu l-ewwel rebħa għand l-istess Faroes … iżda żewġ goals f’temp ta’ żewġ minuti l-avversarji tagħna dawru telfa f’rebħa b’xutt imdawwar ta’ ANDREAS LAVA OLSEN (89)  wara clearance qasira mid-difiża Maltija u  minn free-kick stupend ta’ Brandur Hendriksson (91).

FAROE ISLANDS: 1-Gunnar Nielsen,  2-Joannes Danielsen, 3-Viljornur  Davidsen, 4-Heini Vatnsdal, 5-Sonni Ragnar  Nattestad, 6-Hallur Hansson, 7-Joannes Bjartalid (14-Patrik Johannesen 80), 8-Brandur Hendriksson, 10-Solvi Vatnhamar, 11-Klaemint Olsen (9-Andrea Olsen 80), 18-Meinhard Olsen (20-Dan Soylu 65) – Coach: Hakan Ericson

MALTA: 1-Henry Bonello, 3-Ryan Camenzuli, 4-Steve Borg, 5-Andrei Agius, 6-Matthew Guillaumier, (17-Teddy Teuma 79), 7-Joseph Mbong, 9-Kyrian Nwoko, 10-Steve Pisani (11-Rowen Muscat  85), 18-Jurgen Degabriele (19-Paul Mbong 71), 20-Luke Gambin, 22-Zach Muscat – Coach: Devis Mangia

REFEREE: Adam Farkas (Ungerija)

ASS. REFEREES: Balazs Szert, Theodoros Georgiou (Ungerija)

RABA’ UFF: Ferenc Karako (Ungerija)

SKORERS: K. Olsen 25, A. Olsen 89, B. Hendriksson 91,  (FI); J. Degabriele 37, A. Agius 72 (M)

AMMONITI: S. Vatnhamar, J. Danielsen (FI); M. Guillaumier, K. Nwoko (M)

Share With: