Tewmin imwaħħlin minn rashom separati f’żewġt itrabi b’saħħithom f’operazzjoni ta’ madwar 24 siegħa

Tewmin li twieldu mwaħħlin flimkien minn rashom ġew separati minn xulxin f’operazzjoni ta’ madwar 24 siegħa.

Abigail Bachinskiy u oħtha Michela li għandhom għaxar xhur issa m’għadhomx maqgħdin ħaġa waħda mill-kranju, inkluż l-moħħ u dan grazzi għall-operazzjoni kkumplikata ħafna li kienet tirrikjedi l-esperjenza u l-kapaċità tal-professjonisti. L-operazzjoni li kienet meqjusa bħala suċċess seħħet fi tmiem il-ġimgħa li għaddiet f’Sacramenti f’Kalifornja.

Dr Michael Edwards qal li dawn il-każi ta’ trabi mwaħħlin hija xi ħaġa rari, iżda sfortunatament aktar rari minn hekk hija dawk li wara t-twelid jiġu separati f’żewġt itrabi b’saħħithom.

L-omm rrakkuntat dwar ix-xokk tagħha meta ngħatat l-aħbar li fil-ġuf kellha żewġt itrabi mwaħħlin, u faħħret lil żewġha li kien ta’ sostenn kbir f’din l-aħbar xokkanti.

It-trabi issa se jkunu qed iqattgħu xi ġimgħat fit-taqsima tal-kura intensiva fejn se jinżammu taħt osservazzjoni minħabba li t-tobba stess ammettew li għad hemm ħafna li mhuwiex magħruf dwar tali operazzjonijiet.

L-omm kkonkludiet tgħid li hi temmen li kollox se jmur tajjeb u li għalkemm m’hemmx kliem biex tiddeskrivi l-kapaċità ta’ dawk kollha involuti, issa kollox jinsab f’idejn Alla. 

Share With: