UNL: Malta fi draw ta’ mingħajr goals kontra Andorra

Ritratt: Dominic Aquilina

Andorra ……0

Malta ……….0

F’partita bilanċjata valida mill-UEFA Nations League, barra minn darna Malta spiċċat fi draw ta’ 0-0 kontra Andorra … biex dan kien it-tielet draw minn daqstant partiti fil-konfronti diretti bit-tnejn l-oħra jispiċċaw bl-iskor ta’ 1-1.

Mill-aħħar logħba li fiha l-Maltin għelbu lill-Ġibiltá 2-0, nhar l-Erbgħa li għadda, il-coach, Devis Mangia, għamel xejn inqas disa’ bidliet fejn Ryan Camenzuli u Andrei Agius biss kienu fil- formazzjoni  inizjali. 

L-ewwel taqsima kienet waħda bilanċjata fejn iż-żewġ goalkeepers rari ġew impenjati.

Filwaqt li Andorra ffollaw nofs il-ground, il-Maltin għażlu li jattakkaw permezz taż-żewġ faxex late­rali bl-overlappings ta’ Ryan Camenzuli u Joseph Mbong li f’bosta drabi ħolqu paniku fid-difiża avversarja.

Fit-tieni taqsima, Andorra baq­għu jaddattaw l-istess tattika … dik distruttiva aktar milli kostruttiva … bl-objettiv tagħhom ikun li ma jsofrux il-goal.

Min-naħa tal-Maltin, ippruvaw jiftħu pressjoni iżda quddiemhom sabu ħajt uman li għalaq kull spazju neċessarju biex il-goalkeeper avversarju beda jiġbor il-ballun mingħajr l-ebda periklu.

Id-difiża Maltija dehret ixxam­plata tikkontrolla l-furja dgħajfa ta’ Andorra iżda kien irritanti l-fatt li bdew jilagħbu l-ballun fuq wara u jħabbtu ma’ Bonello li seta’ sewa detrimentali. 

L-ewwel azzjoni denja waslet fit-tmien minuta meta Camenzuli xeħet cross insidjuż fil-kaxxa avversarja u minn pożizzjoni ideali d-daq­qa ta’ ras ta’ Luke Gambin spiċċat ftit għoli.

Ir-reazzjoni ta’ Andorra kienet waħda mmedjata fejn kien Joseph Mbong li biegħed il-periklu minn azzjoni ta’ corner. Il-Maltin irreċiprokaw b’corner ieħor fejn Andrei Agius ma rnexxielux jikkonnettja mal-ballun biex seta’ anke fetaħ l-iskor.

Imbagħad il-logħob kien staġnat f’nofs il-ground hekk kif iż-żewġ difiżi annullaw lill-attakkanti rispettivi … sakemm fl-24 minuta, Paul Mbong indirizza xutt minn barra l-kaxxa li l-goalkeeper Josep Gomes laqa’ parzjalment, b’Jurgen Degabriele joħroġ għar-rebound iżda kien senjalat f’pożizzjoni ta’ offside.

Fl-34 minuta, Degabriele ma la­ħaqx fil-ħin mill-cross ta’ Camenzuli li ddistingwa lilu nnifsu anke fid- difiża.

Fil-ħin miżjud tal-ewwel taqsima ħlisniha ħafif meta l-volley ta’ Alex Martinez għadda jħakkek mal-mimduda b’Henry Bonello megħ­lub għal kollox.

Ħames minuti mill-ftuħ tat-tieni taqsima, indeċiżjoni bejn Bonello u Steve Pisani ppreżentat lil Cristian Martinez b’opportunitá tad-deheb li jiftaħ l-iskor … iżda b’xorti tajba quddiem lasti vojta falla l-mira.

Sal-84 minuta, ma rajna l-ebda azzjoni perikoluża iżda mill-free-kick ta’ Jake Grech, Martinez kien għoddu kkommetta auto-goal f’tettattiv li jikklerja meta laqat ħażin il-ballun. 

ANDORRA: 1-Josep Gomes, 2- Cristian Martinez (21-Marc Garcia 86), 3-Marc Vales, 5-Emil Garcia, 7-Marc Pujol, 8-Marcio Vieira, 9-Aaron Sanchez (19-Luigi San Nicolas 85), 14-Ricard Fernandez (10-Jordi Alaez 70), 16-Alex Martinez (22-Victor Bernat 94), 17-Joan Cervos, 23-Jordi Rubio   – Coach: Koldo Alvarez

MALTA: 1-Henry Bonello, 3-Ryan Camenzuli, 4-Steve Borg, 5-Andrei Agius, 7-Joseph Mbong, 10-Steve Pisani (14-Bjorn Kristensen 79), 17-Teddy Teuma, 18-Jurgen Degabriele (9-Luke Montebello 61), 19-Paul Mbong (8-Jake Grech 79), 20-Luke Gambin, 22-Zach Muscat – Coach: Devis Mangia

REFEREE: Alain Durieux (Lussemburgu)

ASS. REFEREES: Gilles Francois Becker, Joaquim Da Silva (Lussemburgu)

RABA’ UFF.: Ricardo Morais  (Lussemburgu)

AMMONITI: C. Martinez, M. Vales, J. Cervos (A); S. Borg (M)