Balzan u Senglea A. jieħdu punt kull wieħed permezz ta’ żewġ penalties

ritratt: Domnic Borg

Balzan …….…1

Senglea A. ….1

Balzan u Senglea Athletic skorjaw penalty kull wieħed biex qasmu l-punti fi draw ta’ 1-1 f’ logħba nieqsa mill-azzjonijiet.

Bla dubju, Balzan kien l-aktar team diżappuntat b’dan ir-riżultat hekk kif issa ilhom ħames logħbiet ma jiksbu rebħa biex baqgħu fin-nofs il-klassifika.

Min-naħa l-oħra, Senglea rnexxielhom iwaqqfu l-mixja negattiva ta’ sitt tel­fiet konsekuttivi bil-coach tagħhom Clive Mizzi jiġbor l-ewwel punt wara li ngħaqad magħhom ix-xahar li għadda.

Balzan kellhom aktar mill-pussess matul l-ewwel taqsima iżda sabuha diffiċli biex jinfdu id-difiża Sen­gleana.

Fil-11-il minuta, McWoods għadda l-ballun lejn Lju­bomirac li kellu x-xutt tiegħu imblukkat, Steve Pisani ħa r-rebound imma l-konklużjoni tiegħu kienet salvata minn Matthew Farrugia.

Senglea bdew jidħlu aktar fil-logħba u ħarba tajba ta’ Junior Dibola Diwoto fuq il-lemin ratu jaqbeż lil Loof iżda x-xutt tiegħu ġie mblukkat minn Vranes minuta minn tmiem l-ewwel taqsima.

Balzan tilfu ċans tad-deheb li jmorru minn fuq fit-62 minuta meta minn cross ta’ Moussa Kamara, McWoods u Dimic ma rnexxielhomx jikkonkludu minn quddiem il-lasti.

Madankollu fit-73 minuta, Stefan Dimic ġie mwaqqa’ fil-kaxxa minn Andre Scicluna bir-referee ma jkollu ebda għażla ħlief li jordna penalty għal Balzan li minnu ERIC LEMOND McWOODS ma falliex biex poġġa lil Balzan 1-0 minn fuq.

Hekk kif Balzan dehru resqin lejn rebħa minima, fil-85 minuta, Samir Arab mess il-ballun b’idu fil-kaxxa biex ir-referee jordna penalty ieħor, din id-darba għal Senglea.

Ix-xutt ta’ JUNIOR DIBOLA DIWOTO ġie milqugħ f’ żewġ tentattivi minn Vukasin Vranes imma r-referee or­dna li l-penalty jerġa’ jingħata hekk kif il-goalkeeper ta’ Balzan kien ħareġ minn fuq il-linja bl-attakkant mill-Kamerun ma jfallix biex iġib l-iskor indaqs.

BALZAN: 83-Vukasin Vranes, 3-Augustine Loof, 5-Samir Arab, 8-Paul Fenech, 9-Eric Lemond McWoods, 10-Steve Pisani, 11-Steve Bezzina (17-Alfred Effiong 68’), 15-Michael Johnson (88-Sean Cipriott 27’), 18-Uros Ljubomirac, 23-Stefan Dimic, 99-Moussa Kamara – Coach: Mark Miller

SENGLEA A.: 1-Matthew Farrugia, 5-Zachary Cassar, 6-Alan Abela, 9-Kevaughn Atkinson (15-Ricardo Martin 58’), 11-Igor Misan, 17-Jan Tanti (4-Nikola Terzin 93’), 20-Andre Scicluna, 24-Junior Dibola Diwoto, 27-Dejan Kukic, 30-David Xuereb, 89-Wilkerson Gomes – Coach: Clive Mizzi

REFEREE: Andrea Sciriha

ASS. REFEREES: Jurgen Spiteri, Duncan Spencer

RABA’ UFF: Matthew Degabriele

SKORERS: E. McWood 74 pen  (B); J. Diwoto 87 pen (SA)

AMMONITI: M. Kamara, E. McWoods, U. Ljubomirac, S. Arab, V. Vranes (B); K. Atkinson (S)

Share With: