Illum mistennija tiġi approvata t-tilqima ta’ Pfizer

Minkejja li bħalissa għad m’hemm ebda tilqima awtorizzata kontra l-Covid-19 fl-Unjoni Ewropea, proprju llum mistennija ssir laqgħa għall-approvazzjoni tal-ewwel tilqima fl-Ewropa kontra dan il-virus. Din il-laqgħa straordinarja hija organizzata fil-kuntest tal-evalwazzjoni tat-tilqima BNT162b2 żviluppata minn BioNTech u Pfizer.

B’hekk illum mistennija tingħata l-awtorizzazzjoni meħtieġa min-naħa tal-Aġenzija Ewropea tal-Mediċina, ġimgħa qabel iż-żmien li kien mistenni. Il-tilqima kontra l-Covid-19 se tiġi awtorizzata għall-UE biss jekk l-evidenza xjentifika turi li l-benefiċċji tat-tilqima huma akbar minn kwalunkwe riskju.

Awtorizzazzjoni għat-tqegħid fis-suq tiżgura li t-tilqima kontra l-Covid-19 jissodisfaw l-istess standards għoljin tal-UE bħat-tilqim u l-mediċini kollha. Il-tilqima kontra l-Covid-19 se tkun disponibbli fl-Istati Membri kollha tal-UE fl-istess ħin. B’dan il-mod l-Istati Membri kollha jistgħu jibbenefikaw mix-xogħol konġunt magħmul fil-livell tal-UE u jippermettulhom jibdew il-kampanji ta’ tilqim tagħhom fl-istess ħin ukoll.

Kif ħabbret il-President tal-Kummissjoni Ewropea Ursula Von Der Leyen, fis-27 ta’ Diċembru mistennija jibdew jitlaqqmu l-ewwel nies madwar l-Unjoni Ewropea. Din l-aħbar ġiet ikkonfermata mill-Prim Ministru Robert Abela u mid-Deputat Prim Ministru u Ministru tas-Saħħa Chris Fearne u dan ifisser li Malta, bħall-kumplament tal-Ewropa, mistennija tibda tagħti t-tilqima f’dik il-ġurnata wkoll. Kif spjega d-Deputat Prim Ministri, dawk li se jibdew jitlaqqmu mill-ewwel jum huma staff mill-ITU, mill-IDU u mill-emerġenza. Fit-tieni ġurnata se jkunu staff mill-isptar t’Għawdex, mill-Isptar Monte Karmeli u mill-Kura Primarja, imbagħad jibdew jitlaqqmu l-carers u l-anzjani ġewwa d-djar tal-anzjani.

Kif taħdem l-approvazzjoni tat-tilqim tal-UE?

Bħall-mediċini kollha, it-tilqim l-ewwel nett jiġu ttestjati fil-laboratorju, imbagħad jiġu ttestjati fuq voluntiera umani f’diversi sessjonijiet ta’ studju msejħa ‘provi kliniċi’. Dawn il-provi jgħinu biex jiġi kkonfermat kif jaħdmu t-tilqim u jiggarantixxu l-benefiċċji tagħhom jegħlbu kwalunkwe effett kollaterali jew riskju potenzjali. 

Ladarba jkun hemm biżżejjed informazzjoni minn riċerka u provi kliniċi, il-kumpaniji jkunu jistgħu japplikaw għand l-Aġenzija Ewropea għall-Mediċini għal awtorizzazzjoni biex it-tilqima titqiegħed fis-suq tal-UE. L-Aġenzija Ewropea għall-Mediċini tevalwa d-data kollha u twettaq valutazzjoni xjentifika bir-reqqa u indipendenti tat-tilqima. Abbażi tal-valutazzjoni xjentifika tal-Aġenzija, il-Kummissjoni Ewropea tagħti awtorizzazzjoni ta’ kummerċjalizzazzjoni fl-UE. It-tilqim imbagħad ikun jista’ jintuża.

Share With: